ஜெனிலியா, நயன்தாராதான் எனக்கு பொருத்தமான ஜோடி! - தனுஷ்

 

 

 

`எத்தனையோ கதாநாயகிகளுடன் நடித்திருந்தாலும் எனக்கு பொருத்தமான ஜோடி ஜெனிலியாவும், நயன்தாராவும்தான் என்று நடிகர் தனுஷ் கூறியுள்ளார். கொலவெறிடி பாடல் ரசிகர்களிடையே சூப்பர் ஹிட் ஆனதோடு மட்டுமல்லாமல், பிரதமர் கொடுக்கும் விருந்தில் கலந்து கொள்கிற அளவுக்கு பிரபலமாகியிருக்கிறது.

 

இதுபற்றி கருத்து தெரிவித்திருக்கும் தனுஷ், பிரதமர் விருந்தை நான் எதிர்பார்க்கவே இல்லை. படத்துக்கு தகுந்த பாடலாக இருக்கும் என்றும், மக்களுக்கு திருப்தி தரும் பாடலாக இருக்கும் என்றும் எதிர்பார்த்தோம். இந்த அளவுக்கு பிரபலமானதற்கு கடவுளின் கருணையும், மக்கள் கொடுத்த வரவேற்பும்தான் காரணம், என்று கூறியுள்ளார்.

 

மேலும் அவர் கூறுகையில், மற்ற டைரக்டர்களின் படங்களில் நடித்ததற்கும், எனது மனைவி ஐஸ்வர்யா டைரக்ஷனில் நடித்ததற்கும் பெரிய வித்தியாசம் எதுவும் இல்லை. டைரக்ஷன் வேலையை சிலசமயங்களில் வீட்டுக்கும் எடுத்து வருவார். அதனால் நாங்கள் சண்டை போட்டுக்கொண்டது உண்டு. இது எல்லா வீட்டிலும் நடக்கிற சண்டைதான். அவர் நிச்சயமாக தொடர்ந்து படங்களை இயக்குவார். ஆனால், அவர் டைரக்ஷனில் நான் நடித்த முதல் படமும், கடைசி படமும் இதுதான். இனிமேல் அவரது படத்தில் நடிக்க மாட்டேன். மற்ற கம்பெனிகளுக்கு ஐஸ்வர்யா தொடர்ந்து படங்கள் இயக்குவார், என்றார்.

 

பொருத்தமான ஜோடி குறித்த கேள்விக்கு பதில் அளித்திருக்கும் தனுஷ், ஒவ்வொருவரும் ஒவ்வொரு விதத்தில் பொருத்தமானவர்கள்தான். உடல்வாகைப் பொருத்தவரை ஜெனிலியா எனக்கு பொருத்தமானவர். கெமிஸ்ட்ரிபடி நயன்தாராதான் பொருத்தமானவர். என்று கூறியுள்ளார். அன்னா ஹசாரேவின் உண்ணாவிரதம் பற்றிய கேள்விக்கு அந்த பெரியவரை பற்றி கருத்து சொல்கிற அளவுக்கு எனக்கு வயதும் இல்லை, அனுபவமும் இல்லை. பொதுமக்களோடு ஒருவனாக நின்று, அவரை அன்னாந்து பார்க்கிறேன், என்று கூறியிருக்கிறார் தனுஷ்.