பாரத ரத்னா விருது : சச்சினுக்காக விதி மாற்றம்?

Sunday, 18 December 2011

 

 

 

 

 

 

விளையாட்டு வீரர்களுக்கும் நாட்டின் உயரிய விருதான பாரத ரத்னா விருதை வழங்கும் வகையில் மத்திய அரசு சில சட்டத் திருத்தங்களை செய்து உள்ளது. ஆனால் சச்சினை மனதில் வைத்துக் கொண்டே இந்த முக்கியத் திருத்தத்தை மத்திய அரசு செய்துள்ளதாக கருதப்படுகிறது. சச்சினுக்கு பாரத ரத்னா தர வேண்டும் என்று தொடர்ந்து நெருக்கிக் கொண்டிருக்கிறார்கள் என்பது நினைவிருக்கலாம்.

 

இந்தியாவில் வழங்கப்படும் விருதுகளில் மிகப் பெரிய சிவிலியன் விருது பாரத ரத்னா. இந்த விருது பொதுவாக கலை, இலக்கியம், அறிவியல், பொது வாழ்வில் சிறந்த நபர்களுக்கு வழங்கப்பட்டு வந்தது. விளையாட்டு வீரர்களுக்கு இந்த விருது பெறத் தகுதி கிடையாது. ஆனால் கிரிக்கெட் போட்டிகளில் பல சாதனைகளை படைத்து, இந்தியாவுக்கு பெருமை சேர்த்த சச்சினுக்கு, பாரத ரத்னா விருது வழங்க வேண்டும் என்று முன்னாள் கிரிக்கெட் வீரர்கள், அரசியல்வாதிகள், அன்னா ஹசரே போன்ற பொது வாழ்வில் உள்ளவர்களும் வலியுறுத்தி வந்தனர். யாரைப் பார்த்தாலும் சச்சினுக்கு பாரத ரத்னா தர வேண்டும் என்ற கோரிக்கை வலுத்து வந்தது.

 

ஆனால் விதிமுறை அதற்கு இடம் தரவில்லை என்பதால், பாரத ரத்னா விருதினை விளையாட்டு வீரர்களுக்கும் வழங்கும் வகையில், மத்திய அரசு சில சட்டத் திருத்தங்களை செய்ய வேண்டும் என்று மத்திய விளையாட்டு அமைச்சகம் கோரிக்கை விடுத்தது. இது குறித்து மத்திய உள்துறை அமைச்சகம், பிரதமருக்கு பரிந்துரை செய்தது.

 

பிரதமர் அனுமதி அளித்ததை தொடர்ந்து, பாரத ரத்னா விருது வழங்கும் விதிமுறைகளில் சில மாற்றங்கள் செய்யப்பட்டது. அதன்மூலம் தற்போது கிரிக்கெட் சாதனையாளர் சச்சின், முன்னாள் பிரபல ஹாக்கி வீரர் தயான் சந்த் உள்ளிட்டோர் பாரத ரத்னா விருது பெற தகுதிப் பெற்று உள்ளனர். விளையாட்டுத்துறையிலிருந்து பார ரத்னா விருது பெற எக்கச்சக்கம் பேர்தகுதி படைத்தவர்களாக உள்ளனர். அப்படிப்பட்டவர்களுக்கு அந்த விருது முதலில் தரப்படுமா அல்லது சச்சினுக்கு முதலில் கொடுத்து விட்டு பிறகு மற்றவர்களுக்குத் தரப்படுமா என்பது தெரியவில்லை.

 

கடந்த 1954ம் ஆண்டு ராஜகோபாலச்சாரிக்கு முதல் பாரத ரத்னா விருது வழங்கப்பட்டது. அதன்பிறகு ஜவகர்லால் நேரு, இந்திராகாந்தி, காமராஜர், அம்பேத்கார், எம்.ஜி.ஆர், ராஜீவ் காந்தி, அப்துல்கலாம், எம்.எஸ்.சுப்புலட்சுமி, லதா மங்கேஷ்கர் உட்பட 41 பேருக்கு பாரத ரத்னா விருது வழங்கப்பட்டுள்ளது.

 

மேலும் நெல்சன் மண்டேலா, அன்னை தெரசா உள்ளிட்டோரும் பாரத ரத்னா விருதை பெற்று உள்ளனர். கடந்த 2009ம் ஆண்டு இந்துஸ்தான் இசைக் கலைஞர் பண்டிட் பிஷ்மன் ஜோஷி பாரத ரத்னா விருது பெற்றார்.

comments | | Read More...

கொஞ்சம் ஓவராத்தான் போய்ட்டிருக்கு: டிராவிட் அதிருப்தி!

 

 

டெஸ்ட் போட்டியை மேலும் பிரபலப்படுத்தும் வகையில் டெஸ்ட் போட்டிகளை பகல்-இரவு போட்டிகளாக நடத்த வேண்டும். மேலும் தேவையற்ற ஒருநாள் போட்டிகளை நடத்துவதை நிறுத்த வேண்டும் என்று இந்திய வீரர் டிராவிட் விருப்பம் தெரிவித்து உள்ளார்.

 

ஆஸ்திரேலிய சுற்றுப் பயணம் சென்றுள்ள இந்திய அணியில் இடம் பெற்றுள்ள டிராவிட், நேற்று முன்னாள் கிரிக்கெட் வீரர் பிராட்மேனின் நினைவு நிகழ்ச்சியில் பேசினார். அப்போது டெஸ்ட் போட்டிகளுக்கு அதிக முக்கியத்துவம் கொடுக்கும் வகையில், பகல்- இரவு டெஸ்ட் போட்டிகளை நடத்தலாம் என்று டிராவிட் கருத்து தெரிவித்தார்.

 

இது குறித்து கிரிக்கெட் வீரர் டிராவிட் கூறியதாவது,

 

கடந்த 1985ம் ஆண்டும் கிரிக்கெட் ரசிகர்களுக்கு ஒருநாள் போட்டிகளின் மீது விருப்பம் இல்லாமல் இருந்தது. ஒருநாள் போட்டிகள் தேவையில்லாமல் நடத்தப்படுவதாக கிரிக்கெட் ரசிகர்கள் தெரிவித்தனர்.

 

ஆனால் தற்போது கிரிக்கெட் ரசிகர்களுக்கு ஒருநாள் மற்றும் டுவென்டி20 போட்டிகளின் மீது அதிக ஆர்வம் ஏற்பட்டுள்ளது. ஆனால் டெஸ்ட் போட்டிகளில் பங்கேற்கவே ஒவ்வொரு கிரிக்கெட் வீரரும் விரும்புகின்றனர். டெஸ்ட் போட்டிகளின் மூலம் தான் ஒரு சிறந்த கிரிக்கெட் வீரரின் திறமைகளை அறிய முடியும்.

 

எனவே டெஸ்ட் போட்டிகளை பாதுகாக்க வேண்டும். அதற்காக டெஸ்ட் போட்டிகளை பகல்- இரவு போட்டிகளாக நடத்தலாம். மேலும் டெஸ்ட் சாம்பியன்ஷிப் தொடர்களை நடத்த ஐ.சி.சி. முன்வர வேண்டும். டெஸ்ட் போட்டிகளை பகல்- இரவு போட்டிகளாக நடத்தினால், சிவப்பு பந்தை சரியாக பார்க்க முடியாது என்பது உண்மை தான். ஆனால் கிரிக்கெட் போட்டியின் வளர்ச்சிக்கு தடையாக கிரிக்கெட் பந்தின் நிறம் தடையாக இருக்காது.

 

டெஸ்ட் சாம்பியன்ஷிப்பை 2013ம் ஆண்டு நடத்த ஐ.சி.சி. முடிவு செய்து இருந்தது. ஆனால் விளம்பர நிறுவனங்களும், ஒளிப்பரப்பு நிறுவனங்களும் சேர்ந்து டெஸ்ட் சாம்பியன்ஷிப்பை 2017க்கு தள்ளி வைக்க ஐ.சி.சி.க்கு நெருக்கடி கொடுத்தன.

 

சமீபகாலமாக ஒருநாள் போட்டிகள் அதிக அளவில் நடத்தப்படுகின்றன. அதிக அளவில் ஒருநாள் போட்டிகள் நடத்தப்படுவதால் ரசிகர்களிடம் கிரிக்கெட் ஆர்வம் குறைந்து வருகிறது.

 

இங்கிலாந்து, இந்தியா அணிகளுக்கு இடையிலான தொடர்கள் அடுத்தடுத்து நடத்தப்பட்டதால் போட்டிகளை காண வந்த ரசிகர்களின் எண்ணிக்கை குறைந்தது. இந்திய அணி, இங்கிலாந்து சென்று விளையாடிய போது ரசிகர்களிடையே ஆர்வம் இருந்தது. அடுத்த வாரத்திலேயே அதே இரு அணிகளும் மீண்டும் மோதியதால், ரசிகர்கள் இடையே போட்டியை காணும் ஆர்வம் குறைந்தது.

 

இதன் மூலம் கிரிக்கெட் போட்டிகளுக்கு வரவேற்பு குறைந்து வருவதை காண முடிந்தது. எனவே உலகப் கோப்பை போன்ற முக்கிய போட்டிகள் தவிர தேவையற்ற ஒருநாள் தொடர்களை நடத்துவதை நிறுத்த வேண்டும்.

 

கிரிக்கெட் போட்டிகளை ரசிகர்கள் டிவியில் பார்ப்பதால், கிரிக்கெட் மைதானத்தில் உள்ள பார்வையாளர்கள் பகுதி வெறிச்சோடி கிடக்கும் நிலை ஏற்படும். இதனால் கிரிக்கெட் போட்டியின் மீது உள்ள விளம்பர நிறுவனங்களின் ஆர்வமும் எதிர்காலத்தில் குறைய வாய்ப்பு உள்ளது, என்றார்.

comments | | Read More...

சொந்தநாட்டிலேயே அகதியாக்கப்படும் தமிழன்: கேரளாவிலிருந்து 170 தமிழ் குடும்பங்கள் விரட்டியடிப்பு

Saturday, 17 December 2011

 

 

 

கேரளா மாநிலத்தில் இருந்து இதுவரை 170 தமிழர்களின் குடும்பங்கள் வலுக்கட்டாயமாக விரட்டியடிக்கப்பட்டு உள்ளனர். அவர்கள் அடர்ந்த வனப்பகுதி வழியே நடந்து தமிழகம் வந்து சேர்ந்தனர்.

 

முல்லைப் பெரியாறு அணைப்பிரச்சினை காரணமாக கேரள மாநிலம் இடுக்கி மாவட்டம், உடும்பன்சோலை, பாப்பம்பாறை, பாரத்தோடு, கைலாசபாறை, காமாட்சிகுளம், ஆனைக்கல் மெட்டு, தூக்குப்பாலம், நெடுங்கண்டம், பகுதிகளில் வசிக்கும் தமிழர்கள் மீது அங்கு வசிக்கும் கேரளாவை சேர்ந்தவர்கள் தாக்குதல் நடத்தி வருகிறார்கள்.

 

இதனால் தோட்டத்தொழிலாளர்கள் தேவாரம் குதிரைப்பாஞ்சான்மலையின் வழியாக சதுரங்கப்பாறை, சாக்குலூத்து மெட்டு மலையடிவார பகுதிகளில் இருந்து சுமார் 8 கிலோ மீட்டர் தூரம் நடந்து தமிழகத்துக்கு வருகின்றனர். ஏற்கனவே 70 குடும்பத்தினர் விரட்டியடிக்கப்பட்ட நிலையில், நேற்று மேலும் 100 குடும்பங்களை சேர்ந்தவர்கள் வந்துள்ளனர். கடந்த 3 தினங்களாக 170 குடும்பங்களை சேர்ந்த 500க்கும் மேற்பட்டவர்கள் வந்துள்ளனர்.

 

தேனி மாவட்ட கலெக்டர் கே.எஸ்.பழனிச்சாமி உத்தரவின் பேரில் அவர்களை இங்குள்ள பள்ளிகளில் தங்க வைத்து மதிய உணவு, பால், ரொட்டி, போன்றவைகளை வருவாய்த்துறையினர் வழங்கி வருகிறார்கள். இவர்களுக்காக அந்த பள்ளியிலேயே சமையலும் செய்யப்படுகின்றது. மேலும் அவர்களின் விருப்பத்துக்கிணங்க சொந்த ஊர்களுக்கும் அனுப்பி வைக்கப்படுகின்றனர்.

 

இவர்களில் வீடுகள் இல்லாதவர்கள் பற்றி வருவாய்த்துறை அலுவலர்கள் கணக்கெடுத்து தனியார் மண்டபங்களில் தங்க வைக்க ஏற்பாடு செய்து உள்ளனர். கேரளாவில் உள்ள தமிழர்களுக்கு ஏற்பட்டுள்ள பரிதாபநிலை குறித்து கேரளாவில் இருந்து வெளியேறி தேவாரத்திற்கு வந்தவர்கள் கூறியதாவது:

 

அழகுராணி: (உடுப்பஞ்சோலை), கேரளாவில் நாங்கள் பல ஆண்டுகளாக தங்கி எஸ்டேட்களில் வேலை செய்து வருகிறோம். இரவு நேரங்களில் குடிபோதையில் வரும் கேரளாவைச் சேர்ந்த அரசியல் கட்சியினர் வாய்க்கு வந்தபடியெல்லாம் திட்டினார்கள். இதனால் நான் பயந்தபடி இரவு நேரத்தில் யானைகளின் பயத்திற்கு இடையே எனது சிறு குழந்தையை தூக்கிக்கொண்டு வந்தேன்.

 

அபிலாஷ், அம்மு: (செம்மனார் எஸ்டேட்) : நாங்கள் கேரளாவில் உள்ள பள்ளிகளில்தான் படிக்கிறோம். முல்லைப்பெரியாறு அணைப் பிரச்சினையினால் எங்களை பள்ளிகளிலேயே மாற்றாந்தாய் மனப்பான்மையுடன் நடத்துகின்றனர். கடந்த 3 நாட்களாக ஏற்பட்ட நெருக்கடியினாலும், எங்களது குடும்பத்தினரை மலையாளிகள் கும்பல் மிரட்டியதாலும் அதிகாலையில் எழுந்து நடந்து வந்தோம். இதுபோன்ற பரிதாபநிலை வேறு யாருக்கும் ஏற்படக் கூடாது.

 

மணிகண்டன்(உடும்பன்சோலை): எனக்கு கேரளாவில் வாக்குரிமை உள்ளது. குடும்பத்தோடு எஸ்டேட் கூலித்தொழிலளியாக வேலை பார்க்கிறேன். முல்லைப் பெரியாறு பிரச்சினைக்கு பின்பு இங்குள்ள யூனியன்களில் கூட தமிழர்கள் என்ற காரணத்தால் புறக்கணிக்கப்படும் நிலை உள்ளது. கேரளாவை சேர்ந்தவர்கள் எங்களை விரட்டும் நோக்கத்தோடு திட்டினார்கள். எதற்கு பிரச்சினை என்று கிளம்பி வந்துவிட்டோம். மேற்கண்டவாறு அவர்கள் கூறினார்கள்.

 

comments | | Read More...